Majuro, Marshall Islands — January 6, 2025 — Her Excellency, President Hilda C. Heine delivered her statement for the Opening Ceremony of the 46th Constitutional Regular Session of the Nitijela.
–
Statement for the Opening Ceremony of the
46th Constitutional Regular Session of the Nitijela 2025
Kile im Kamolol
Iokwe im Happy New Year nan komwij kajojo, iloan Imon Kwelok in an Nitijela eo ami, ro rej kobatok im ronjake ipelakin Aelon Kein, im ilikin Aelon Kein.
Kauteej im kile Iroj Jemed Ilan ien otemjej. Kamolol e kin wonake eo an nan kijwoj im Aelon Kein ad!
Kile im Kauteej Manit eo: Chairman eo an Imon Irooj, Irooj Lanny Kabua, Irooj im lerooj ro im owner eo ilo mwin Imon Iroj im ro karejeraer; Irooj im lerooj ro an Majuro in im aolep Irooj im lerooj ro iloan im ilikin Aelon Kein. Kamolol kom kin ijoko konami nan kokajuur manit im jemdoon ko ad nan doon ekkar nan manit.
Kile Speaker Wase im Vice Speaker Zackras im ro Karejermiro; Ro Uaan Cabinet eo, ro karejerami; Senator ro im ro karejerami;
Kile Chief Justice Carl Ingram im Justice ro mottan ilo imon Ekajet eo an Aelon Kein, im ro karejerami bareinwot;
Kile im Kautej kapun ko ad. Ri kaki Lawson Motauto, Chaplain eo an Nitiejla, im eo karejeran; Ri- kaki im Kora in ri Kaki ro ilo aolep kapun ko kajojo im ro karejeraer. Kamolol kom kin ami kotak Kien in ami ilo jar ko ami jen ien nan ien.
Kile ro uaan Diplomatic Corp eo im ro karejereer. Ambassadors rein an lal ko mottad, HE Jeffrey Hsia, Ambassador eo an ROC Taiwan, HE Laura Stone, Ambassador eo an Amerika im Colonel Andrew Morgan; eo ej itok ilo etan Australia, Charge Kallen Phillips; juon special welcome nan HE Hirohisha Soma, Ambassador eo ekaal an Japan nan Aelon Kein, ekoba honorary counsel ro ad, family ko ami;
Kile Hon. Mayor ro kajojo jen local government ko ad im ro karejeraer;
Kile Chief Secretary eo, Chairperson eo an PSC im Commissioners ro mottan, Secretary ro im Heads of Departments (HOD) ro kajojo im ra dik ko mottan Kien im ro karejerami;
Kile ro uaan private sector eo, doluul ko ilikin Kien (NGOs ko);
Kile aolep armej in Majol, ijoko otemjej.
Mokta jen ao letok enaan in ao ilo jibon in ij kajitok jidik ien kejeklokijen im kememej e ro mottad raar jako week eo lok ilo boating accident eo ikotaan Arno im Majuro. Ad naan in buromij lok ipan baamle im nuking ko aer kajojo. (1 minute of silence)
Kom emmol.
Happy New Year nan aolep iloan mwin im ijoko jabdewot, elaptata nan ro rej tune in jen turtur ko kajojo.
Family eo amiro ear maron pad im kemem e Christmas ilo Aur. Juon week in kakkije eo jej aikuji nan re-charge battery in jerbal ko ad.
Ij kamolol Manit eo, Ri Kaki ro im aolep ri tel ro an jukujikun pad ko an armij in Aur kin karauinene ko aer nan ro raar ilok jen Majuro, ekoba 2 team in ri-Aur jen Amedka ro raar bareinwot lotok im kemem e Christmas ipan ro nukier.
Emoj an jejjet juon iio jen tore eo Kien in kio ear ejaak. Jej kamolol Iroj kin juon iio in jerbal. Ij bareinwot bok ien im kamolol aolep ri jerbal ro an Kien im raar kate ir ilo jerbal ko aer nan komman tobrak im wonmanlok nan Aelon Kein. Ilo ad reimaanlok nan 2025, ejjelok kajitok ke elon bunten ko jej aikuj buki nan kokmanmanlok likjab in jerbal ko ad, im elaptata lemaanlok jokkun mour.
Einwot ke jej mottan lal in, ewor jejjo mool ko im ejjelok ad maron ukoti, mene elap kilaer ilo aer jelet mour ko ad ilo Aelon Kein, ekoba jekjek im weween an menin jeramman ko duoj delon iloan aelon kein.
Juon ian mol kein, diwoj lok in armij, ej walok ipelakin lal in im kio jej loe ilo Majuro im Ebeye im ilo aolep Aelon ko Ilik, emoj an kurmool. Weween in ejelet jerammnan an kajojo jukjukinpad kein ad ilo an iietlok ri boktok jeramman ko jen bwidej kein ad, ekoba ri jerbal ilo Kien in ad.
Iloan iio eo ej jemlok lok, elon oktak ko raar bok jikier ilo Kien eo mottad epaaktata, einwot ilo an dedelok ekeleel eo an President eo an America im wor juon ri tel ekaal nan lal en. Ejelok kajitok ke President-Elect Trump, im leadership in ekaal an America emaron boktok elaplok jeramman ak bareinwot komman jet kakien im weween ko re maron jab ekkar nan aban ko rej jelmae kij im Aelon Kein Ad, einwot ko ilo climate change. Kien in ej reimaanlok nan an jerbal ipan administration in an Donald Trump ilo an wonmaanlok jerbal in kattore Compact ak Kon eo ad ipan Amedka.
Tarinae ko an lal ko rellap, ilo Ukraine im ilo Israel, rej bareinwot jelet elon weween ko einwot wonaan mewiuk im mona, wonaan kaan jarom im makutkut ko ion dren im majatoto im ebar lon weween ko jet.
I konaan bok jidik ien im kamolol development partners rein mottad im rej letok peir im jipan ilo elon ian project kein re dedelok im ko rej itok wot. Kien eo an Amedka, Japan, Taiwan im Australia, ekoba ro jet mottad einwot World Bank im ADB im ko jet elap konaer nan edeklok an Aelon Kein.
Kamolol bwe kin jipan ko jen partners rein mottad, lal in ad ej kio bar uaan doluul eo na etan Human Rights Council. Kotobar ko an Majol nan karon lal in kin jimwe im maron im jorran kein jej loi jen nuclear legacy eo je melele kake im jen oktak in mejatoto ak climate change raar emmejaja ilo UN im imaan judge ro an International Court of Justice ilo iio eo kio. Jerbal kein re aurok im jej kamolol ro woj raar bok koner ilo lolorjaki jerbal kein, ekoba Embassy ko ad ilo New York im Geneva.
Agenda 2030, monakjen in jerbal eo an Kien in kio, ej mour im jerbal rainin. Report ko rej tibdiki tobrak in jerbal ko an Kien in ilo year eo ej jemlok lok iumin joor ko 8 ilo Agenda 2030 renaj itok jen kajojo Minister rein ilo aer naj report nan Nitijela im armij in Majol ilo raan im week kane rej pedo tok.
2024 ear iio eo moktata in an Kien in jerbal. Ear juon iio nan elmokote im katok kotobar ko Kien ej lomnak bwe en komani iumin iio kein re kaddu ilo term in jerbal in an. Iumin mol in, Kien ear ejake Agenda 2030 bwe en wor juon monakjen in jerbal.
Konono in ao jibon in ej nan kamolol, koketake im kakememej kijwoj ilo ad delone tok 2025 bwe jen pad wot ilo kojetdikdik bwe Kien in ami elap an kate nan kom. Jet ien, lomnak ko ad rej ioklok wot men ko ejjab po burued kaki, im dik ad kalimjek jerbal ko remman.
Ejja ilo iio in wot, ej iio eo kein kajuon nan kattore Kon eo ipan Amedka ekaal ak Compact jilu. Elon an Kien kein ruo kolmenlokijen ilo weween ad kattor e Compact in. Ijoke jaar loe bwe ejjab aolep ien jej erra ipan doon kin weween kattore eon ko iloan Kon in.
Komman wonmaanlok ejjab bok jikin ilo juon tore ekadu. Elon bunten ko rej aikuj bok jikier bwe kotopar kein ad ren tobrak. Elaptata, einwot ilo Compact jilu, elon wot ian kotopar kein rej pedped ion jipan an rein mottad im jejjab make kaki. Jej jab maron kattori jerbal kein, jet ien ej bok, juon, ruo ak jilu partners, bwe ren tobrak. Jet iaan eon kein rejanin maron ettor (ENRA im END, Health Dialog im climate change) im jet ejanin alikkar weween aer naj emakut nan tore in. Elon ien elap ad makoko kin weween kein ak ejjelok ad maaron. Jej kajitok bwe kijwoj en kijenmij. Aolep men reman rebok ien nan aer tobrak.
Elon ijo je-ekkatak ilo iio in imantata ilo ad kajeon kattore Compact 3, ko renaj jipan ilo jerbal kein maan waj. Kin menin elap unin bwe jen kojatdikdik ilo in ekaal, 2025.
Kinke 2024 ear iio in ekkal, im pojak, 2025 ej iio in kejatdikdik. Botaap jen jab kipedikdik. Jej aikuj jerbal wot im kate kij.
Jej reimaanlok im kejatdikdik bwe iloan iio in ej pedo tok, jerbal ak projects kein renaj bok jikier: Temporary Terminal eo ilo AKIA enaj ekkal im pojak nan an jerbal ilo tore eo enaj rup im kokkaal permanent terminal eo ad; ruo generators an MEC renaj tobrak tok nan jino kojerbali; ruo baluun kaal waan AMI nan aer jino service, juon ilo jemlokin iio in im juon ilo jino in iio in lal; enaj ijjino jerbal in kokaal e Capital Building in ad; jikin liklik eo enaj komman im jino an jerbaal; kakien ko nan an Starlink jerbal ilo Aelon Kein kin wonaan ko remman lok renaj dedelok; project eo nan lelok fiber nan moko imon armij ilo Majuro im Ebeye enaj bok jikin; eliktata im jab diktata, ilo ad kejatdikdik elkin elon allon in kottar, bwe en dedelok jeje etan aolep ri Majol ro rekonaan, jenaj kattore ENRA eo bwe jen lale rara.
Ilo jibon in inaj konono kin jet ian policy im kottopar ko rej unjen im pedped in jet ian jerbal kein an Kien im rej elaajrak ilo Agenda 2030: Juon ian joor lep ko ilo Monakjen Jerbal in ej ikijeen Social Development, ak jemaron in ba jipan nan Armij Mokta.
1.Armij Mokta
Etke Armij Mokta? Ewor juon kokadede an ri belle ej ba “A nation is as strong as its weakest citizen.” Ak jemaron in ba, “Jeramman an armij ro ej pedped eo an juon lal. Elane elon ro remojno ak rejerate ilo lal eo, inem lal eo e jerata bareinwot.”
Mottan kotopar ko an Kien in ej nan kolaplok ejinkoj eo an AOLEP ri Majol jen Kien eo aer! Pedped ion tomak in ke Armij Mokta, ewor jet policy ko emoj aer bok jikier, im ewor jet ko rej pojak in bok jikier. Kien ear kolaplok wonaan ro ediktata wonaer jen $3.50 nan $4.00 ilo Oktoba in iio eo ej jemlok lok; kotopar eo in kio bwe en laplok wonaan ri jerbal ilo kajojo iio mae ronoul rounual-ralitok (2028).
Ke kemro ar lolok armij ro nukid im mottad ilo Aur en ilo Christmas eo kio, rej jirontok kij ke ne ear jab laplok wonaan waini nan jonan ne kio, e bwe an naaj kar bin air kakke aikuj ko aer ilo Christmas eo, elaptata ilo tore in me emoj an laplok woann mour. Menin ej kalikkar nan na ke social policy ak kakien ko nan lonaj jukkun mour an armij rej jerbal im elap aer jipan.
Ook ak Iep in Jipan in Kien ej erlokwe nan baur aolep ro remaron wotlok ilal elane ejjelok jipan nan er, e kobaik ECD program eo ej jipan ajiri im kurae ro, program in discount nan rutto ro ad, im jeen nan jipan kokaal moko imeir, im jipan ko nan ro emojno enbwiner im kolmenlokijen ko aer.
Ewor bar jet kottopa ko umin joor in ak iumin Social development, jet policy ko emoj elmokoti ak rejanin ettor, jej kojatdrikdrik bwe renej ettor ilo 2025:
Tax policy eo bwe ro woneir ediklok jen $8,000 ilo juon iio ren jab kolla tax, en rol jaan in nan armij ro aer;
Social support scheme eo me $100 juon allon, nan ro ejjelok aer jipan jen social security program eo an Kien im ro emojno enbwinier im kolmenlokijen ko aer enej bar boj jikin ilo budget eo ekaal an iio in ekaal.
Jenaj bar linori aolep policy kein ilo kwelok eo elap an aolepan Aelon Kein – National Economic, Social and Climate Change Summit – eo enaj komman ilo week ne jemlokin January nan lukkun etale kolmenlokijen ko an aolep armij ikijeen kotopar kein ad im reimaanlok kein rej pad ilo strategic plan ko ad, ilo Agenda 2030, ekoba National Adaptation Plan eo ad, im elmokot ko jet bwe ren jejjet im weppan ipan aolep.
Jelalokijen nan Aolep ak Universal Access to Education, ej bar mottan social policy kein kien ej jaki maantak. Ak jelalokijen jemelele ej jipan eo juon elap im aurok nan ri Majol.
Imonono in karon Aelon Kein bwe ej kab Kein kajuon ilo bwebwenato in jelalokijon ilo RMI, aolep ri jikuul ro raar kaduojlok jen class 8 raar maron delon ilo grade 9 ilo public high school ko kajojo ilo RMI.
Emoj an bareinwot wonlinlok level in jelalokijen ko rej komman kio. Jemelele ke ej bar walolok bwe pre school ak ajiri ro emen aer iio rar bar maron jino drelon ilo jikuul ko an kien ilo iio eo kio. Education ej ijjino iben 4 iio im walonlok nan iben ro rej kapok aer Master degree ilo institution ilo Aelon Kein. Rejab aikuj emakit jen jokein bwe rej buki ilo katak ko online.
Kadipakpak lok jelalokijen bareinwot ilo kain ekkatak ko renaj duojlok nan ro ilikin center kein, umin kotopar eo bwe en lap kojerbal Digitial Learning. PSS ej kio jino wonmaanlok in. Weween in enaj komman bwe jelalokijen en duojlok online, im bwe jelalokijen nan ro raar jab kadedelok high school ko aer ren maron boke ijoko rej ped ie – bwe ro rokonaan kapok aer degree ilo subcenter kein ren maron wonmaanlok online.
Ilo ad iun maanlok jelalokijen e aurok bwe jen jab meloklok kapeel in jerbal in pa, ak men ne rej ba vocational education, ekoba kapeel ko ad makmake. Je jela bwe kio company ko ad rej aikuj boktok elon ri likin ro elap kapeel ko ibeir bwe ren maron kamane jerbal ko aikuj kommani.
Jej kile ke ej lon wot ajiri rejjab pad ilo jikuul; ekkatak ko nan melele kin un ko rej komman waween in remenin aikuj. Juon in target nan leadership eo ekaal an PSS!
Ij kamolol outgoing Minister eo an Education, Sports im Training, Senator. Joe Bejang kin ijoko konaan nan lonaj jerbal in leto-letak jelalokijn ilo iio eo jemlok lok im karuwaineneik tok Minister in ekaal Honorable Gerald Zackios.
Ejja ilo kotopar kein iumin men eo jej ba social development, elap an Kien in tomak ke ejmour eo an armij rein ad ej aikuj tobar jet jonak ko remanlok jen ijin je pad ie ilo rainin. Im einwot ao kar ba imaanlok, juon lal eo ejjab ejmour ej juon lal eo emojno.
Ak toon wot an jabwe nurse im rijerbal ro ilo jikin ejmouir eo ad, toon wot an naj jab emman an armij ro ad mour. Kin menin, Kien in ej aikuj komman karok ko nan jinoe juon monakjen in jerbal eo nan na mejlan aban in.
Ilo melele ko jen ro rejela im wor kapeel ibeir ilo World Bank im ijoko jet, ejmour an juon lal ej pedped 80% ion kakien ak policy ko an lal eo im rejelet ejmour, im 20% ikijen jikin takto im ejmour eo jej boke jen uno ko. Melelen bwe policy ko an Kien ikijeen kejparok ejmour rej aikuj kajoorlok einwot kolaplok ewoj ko ikijeen den ko retonal, jikka im den in kadok im mona ko rejjab jjipan ejmour.
2. Juon Kien eo Emanlok
Ijelokkin an jabwe ro ewor kapeel ipeir, ilo ao lale, elon ian ro rej jerbal kio ilo Kien eo ad, edik kate ko ipeir. Ilo juon weween, jemaron in ba, edik aer limotak im elewetak kin eddo ko repad ipaer, ion aer-er. Weweein in emoj adwoj ioone im kamolle im weween in ej aikuj bojrak.
Ij kojatdikdik bwe National Employment Policy, ekoba New Salary Scale ko PSC ej pojak in kattore renaj kokmanmanlok weween an ri jerbal rein an Kien jerbal nan armij rein ad.
Jet kein iminene rejjab emman:
Rumij in itok nan jikin jerbal; jako jen jikin jerbal ko; kojerbal menin jerbal ko an Kien nan jerbal ko ad make ak an family ko ad. Ejjelok kajitok ke men kein rej aikuj bojrak.
Ebareinwot ejjelok kajitok ke ej aikuj:
Laplok melele kin eddo ko an juon ri jerbal; im weween kappok jipan elane ejabwe kapeel ko ipad nan komane eddo ko ad;
Kalikkar key performance indicators ak men eo rej ba KPI, ak weween an juon ri jerbal komane jerbal eo an
En laplok an supervisor ro etale weween an ri jerbal ro kommani jerbal ko aer.
En jokkun wot juon komman performance evaluation an ri jerbal im en wor bunten ko buki nan kamool tokjen jerbal ko remman ak ko renana bareinwot.
Ejja ilo weween in wot, kaburbur im karumijmij ko rellon ilo PSC system in ad, ko rej pedped ion kakien ko kio, rej aikuj oktak nan komkajlok boktok ri jerbal ro, kokaal contract ko im kommane etale weween an ri jerbal ro jerbal bwe ren loe kitien jerbal kein aer.
Ijelokin ad kokmanmanlok an ri jerbal ro an Kien Jerbal, ij tomak ke aikuj pidodo lok an investors ro, ak ro rekonan komman aer business ilo Majol in, ekoba business kein ad make ilo weween aer boktok ro ewor kapeel ko ipeir jen likin. Ij konono kin wewen komman foreign investment business license. Ij konono kin weween kokaal visa im work permit ko an rijerbal ro. Ij konono kin emakijkij in nan kokaal health im police clearance ko mene rijerbal rein eto aer jerbal im mour ilo aelon kein; ij konono kin komani aolep men kein online ak ilo internet nan kabidodoiklok im komkajkajlok weween kein aolep; Ij konono kin weween eo rej ba e-governance bwe en bok jikin ilo Kien.
Ejja ilo kotobar in wot, Kien in enaj bok bunten ko nan komman bwe en pidodo lok an ro nukid im mottad ilikin Majol in komman im kokaal passport ko aer ilo ad nej kodrelon tok Embassy im consulate ko ad ipelakin lal in bwe ren bok kunaer ilo jerbal in.
3. Kattõk im Karreoiki Aelon Kein ad – Lojet im Ene Emera
Koba ipan kottapar kein aolep, elap ao rejetak melele in ke jej aikuj katok im kareeoiki Aelon Kein ad, lojet im ene emera jimor.
Iar konono imaanlok, kin aurok in armij ro ilo juon lal. Katok Aelon Kein im karreoki Aelon Kein, re libobo ilo an kotopar in an Kein ilontata im rej lonaj jokkun mour an aolep, jab an juon im ruo, ak an aolep.
Iar bar konono imaanlok kin an lap an ajeeded naninmej ko rejjab kabobo, ak katak ko an ro re tijemlok, rej kwalok ke bwe mona kein kijed make elap on ko ie jen mona ko jej bukitok jen likin, ak men eo ri belle rej ba, processed food.
Ijelokkin an ro nukid im mottad ilo Aelon ko likit aer kejatdikdik ion case in quarter leg ko, ilo aer kememe ien ko rellap ikijeen manit ak kabun ko ad, e torean kiio bwe jen taap bao im piik ko, ekkat ma, ni, bob im binana im boktok jeramman ko jen lojet eo ilo ad komani reaan kein rellap.
Ij melele ke ewor monkajen in jerbal ko rej kepooj i wot ilo ra eo an NRC ak weween in konono kake, enaj aikuji maron ko adwoj aolep, Iroj ro , alap ro im kijwoj jimor.
Ij kamolol Taiwan Technical Mission kin ijoko konaan nan katok Aelon Kein, im bareiwnot aolep ri atake ro im rejjab ebweer ilo aer komani atake ko aer nan najdik family ko aer mona ko reune.
Ilo ad katok bwidej ko ad, jen jab meloklok bwe erreo im ejmour rej ipan doon. Ne etton pelak ko belakid, ion ene emora ak ilo lojet, ejmour eo an juon jukjukinpad enaj pin an emanlok.
Rainin ilo Capital City in ad, im ijoko jet, jej loe an piik ko itoitak ilo melaaj ko ad mene ewor kakien ko nae weween in. Ijelokkin an piik im menin mour ko jet katoon pelak ko ad, jej bareinwot loe bwe ejanin jako jokpej ilik im iar mekarta ewor weween ko remanlok nan kokkon kopej kain ad.
Ij kur nan aolep ro telokkier ekoba, Iroj im Alap rein ad, ro jeban Kein ko redik, bwe ren bok ijoko konaer nan bobrae weween rot in bwe en bojrak.
Tomak eo ao in bwe elane jej jab maron wodde jipel e erreo eo an Aelon Kein ad, enaj komman an abur ad kajeon in lonaj mour im ejmour nan armij rein ad.
Einwot ao kar ba imaanlok ke iio in, ruo taujen im ronoul-lalim (2025) ej iio in kejatdikdik! Ij ba menin ilo jela in ke, iio eo ej jemlok lok, ruo-taujin im ronoul emen (2024) ej iio in ekkal im pojak. Im itok jen kijejeto, borokuk im adwoj jerbal ipan doon, je pojak kio in bok leen menokadu im entaan kein adwoj jimor. Elap kejatdikdik ibba, im ij tomak elap kejatdikdik ibbemi woj, ilo ad kalok juon ilju eo emanlok nan armij ro im lal in ad.
Anij en kojeramman kom im family ko ami im Anij en kojeramman Marshall Island
