HONOLULU, HAWAII – Her Excellency President Hilda C. Heine ear kammane iien bwebwenato eo an ippan jukjuk im pad eo an Ri-Majol ilo Honolulu, Hawaii ilo jikuul eo an Waipahu Intermediate ilo raan in Taije, March 19, 2026.
Ien bwebwenato eo an jukjuk im pad eo ilo Honolulu ear boktok elon kajitok ko nan Her Excellency President Heine kab delegation eo nan bok melele elaptata ikijien aban ko im rejelet Ri-Majol ro im rej jukjuk im amnak ioon Honolulu.
Elon kajitok ko kin health services nan rinaninmej ro ilo aer jibadrok jikin takto ilo Hawaii. President Heine ear kalikar ke ededelok kelet juon company nan an kokaal mwon rinaninmej im ilo torein rej jerbali permit kab jerbal dikdik ko jet nan jinoe jerbal in. Services ko nan komanmanlok wawein aer lale rinaninmij ro ej wonmaanlok wot ilo an dedelok an laplak budget ak jaan ko lilok nan Ministry eo an Health. Ikijien abunono ko rekar walontak kin an mojno riukook nan rinaninmij ro, President Heine ear kalikar ke rinaninmij ro ewor aer jimwe im maron nan kelet riukook eo aer make im rej lo ke emmon im ekkar nan jerbal in.
Ikijien kajitok ko kin wawein an Kien jipan deportee ro kapok aer jerbal ilo Majol, President Heine ear kalikar ke deportee ro remaron apply nan jerbal ko rebellok botab an kajojo company jokelet eo nan won ro rej hire er. Ilo rainin, ewor deportee ro im rej jerbal ilo Obij ko an Kien kab private sector eo.
Ikijien aban ko kin passport, President Heine ear kalikar ke enaj biroro lok wawein an ro rej pad Amedka apply enwot ke ilowaan wot yio in renaj maron kanne application in passport ilo Consulate ko kajojo innem kwonaan Consulate ko loloorjake pepa kein nan kaman passport iben Obiij in passport eo Majol.
Ikijien program ko iumin Compact eo an Majol ipan Amedka enwot Extraordinary Needs Distribution (END) im ENRA program eo, President Heine ear kameleleki jukjukin pad eo ke END im ENRA rar jimor pad ilo negotiation ko an Compact eo im jaan eo an ENRA ej itok jen interest ak jaan eo nejin jen Trust Fund eo im jaan ko an END rejenolok im emoj kejemooji iumin Compact eo.
Ijelokin kenono kein, ear bareinwot wallontak jet kajitok kin Scholarship, Social Support Scheme (SSI) eo, Job Corps program eo, im elmakot ko rej bojen wallontak ilo Constitutional Convention.
Obij eo an President ej kenaan lelok an naan in kamoolol nan Irooj im Lerooj kab Rikaki im Korain Rikaki ro rar kobatok ilo iien bwebwenato in an President Heine ipan jukjuk in pad eo an Ri-Majol ilo Honolulu. Ej bareinwot kamoolol NGO kab Service Providers ro rar boktok melele kab jipan ko nan jukjuk im pad eo – RiMETO, Barbara Tom, Safe Haven, Aloha Care, We Are Oceania, Job Corps Hawaii, Office of Economic Revitalization (OER) City & County Honolulu, Hawaii Workers Center, Hawaii State Office of Language Access. Eliktata im ejab driktata, kamoolol nan Waipahu Intermediate School kin aer maron letok juon jikin bwebwenato emmon iben jukjuk im pad eo.
