lo kar raan in Mandre eo , November 4, 2024, Her Excellency President Hilda C. Heine im First Gentleman Thomas Kijiner, Jr., rar loe lok jukjukinbed eo ilo Mejit nan bwebwenato ippaer kin aikuj im aban ko aer ion Mejit.

Mottan kotobar ko an President Heine, ilo an kar kolaajrak i ilo kobellok eo an Nitijela ilo January eo, ej bwe en kajjeon loe lok jukjukinbed ko ibellakin Majol in nan bwebwenato ippaer im lale aikuj im aban ko aer.

Elikin wot an President Heine bwebwenato ipan jukjukinbed eo ilo Mejit, ekar loe lok imwon takto eo kab jikuul eo ilo Mejit im bwebwenato ipan Takto eo an Hospital eo Mejit, kab Principal eo an jikuul eo ilo Mejit.

Ro rekar kobalok ipan President Heine im First Gentleman Kijiner ilo tureep in nan Mejit ej Minister Jess Gasper, Jr., Senator Dennis Momotaro, Presidential Envoy Senator Daisy Alik-Momotaro, Mayor Neal Keju, Iroij Helkena Anni eo im ej itok ilo etan Iroij Kiton Anni, im rijerbal ro jen Obij eo an President im V7AB.