Remarks of H.E. Hilda C. Heine – “Ukūnim Jād” – Republic of the Marshall Islands 45th Constitution Day 2024
May 1, 2024 – “Iakwe komwoj aolep armij in Aelon Kein, rein ijin ilo jikin ikure in ekaal an armij in Majol, ro roj ronjake ilo radio ko ilo belaak ko kajojo ibelaakin Majol in, im ro roj alwooj online ijoko jabdrewot ibelakin lal in.
Kamolol Anij Jemed moktata ien otemjej, ijoko otemjej.
Kautej Manit eo, Irooj im Lerooj ro adwoj, Chairman Lanny Kabua im Irooj, Lerooj im Owner eo ilo Mweo imweir. Juon kile eo ejenoklok nan Lerroj Esther im Irooj im Lerooj ro mottan ilo Majuro in. Rev. Lawson Matauto im Ri-kaki im Korein Ri-kaki ro ilo kabuin ko ad kajojo, Cabinet ministers ro; Mr. Speaker, Mr. Vice Speaker im ri-pepe ro ad ilo Nitijela eo an ailin kein, Chief Justice Ingram im judge ro ad ilo jikin ekajet ko ad, Chief Secretary eo im aolep jeban ra im agency ko an kien, Chairman im ro uwaan Public Service Commission eo, ro uaan, Diplomatic Corps eo (Amb. & Mrs. Tanaka Katsunari (Japan); Amb.& Mrs. Steve Hsia (ROC Taiwan); Amb. Paul Wilson (Aust); im Charge de Affairs eo an US. Lance Posey ; ij bar Kile Rear Admiral Wangtien Yao Tsung, Commander of the 2024 Midshipment Cruising and Training Squadron im rein raar mottad raar lotok kij jen Taiwan nan jipañ ilo celebration kein an May Day 2024!
Kile Mayor Ladie Jack im mayors im council ko ad kajojo ibelaakin ailin kein, ro ilo business ko ad im roj kake kobban im kajibwebwe-ik menin jeramman ko ilo lal in ad. Juon ao kile eo ejenoklok nan Lerooj Takbad, alap eo, im armij ro air bwidej in jij lokojroro ion. Eliktata im ejjab diktata, juon kile nan aolep rein raar koba tok jen corner ko emen ilo aelon kein, ri jerbal rein jen ministry, agencies ko an Kien im NGO ko kajojo, eḷaptata ri jikuul rein raar bok konaaer ilo parade eo kio.
Iakwe kom aolep bar juon alen!
Ilo Juon Thousand Ruatimjuon Buki Jiljilimjuon-noul Jiljino (1976) eo, ear wor juon pepe bwe en komman juon kwelok elap nan ekkatak kake kab bukot waween ejake juon Jemen-ei an armij in ailin kein im lal in ad—men eo ribelle roj ba constitutional convention. Ear wor 46 ri-pepe ro kelet ir nan Constitutional Convention in kein kajuon, im ilubwilijier, ekar bar einwot jijot jilu iaan kora ro jinen ailin kein.
Elane ejiṃwe ao jenade ik tok, rainin emoj an aolep rein kar uaan ConCon eo moktata likit mour in, ijelokin wot juon, former President im Senator Kessai Note. Juon kile im kamolol nan e.
Bolen elon wot iaad, jejab lukuun jela im melele kin eddo in ri-pepe rein raar jelmae, einwot ke elon wot iair raar jab jet ro im re-tijemlok ilo rebeltan komman kakien, ak ejelok air background ilo law. Im kin menin, jaar aikuij boktok ro im ewor air tijemlok ilo komman kakien ko einwot Laurence Tribe jen Harvard University ilo Amedka, im Allison Baxter jen New Zealand kan.
Ak mekarta, elkin elon ieen ko im monakjen in jerbal ko, im elkin elon iakwalel ko im ebwe wot air kar kaetoktok limo, Ripepe rein raar wonmaanlok wot im kollaiki Jemen-ei in ad ilo kar kwelok eo air, im armij in Majol raar wonmaanlok wot im koweppene Jemen Ei in ad ilo March 1, 1979. Im ilo May 1, 1979 eo, 45 iio kio jen tore in, Jemen-ei eo ear jejjet kitien im jinoe jerbal.
Jen ke ekar jutak lontak kien in ad ilo 1979 eo, emoj an kar komman emen ConCon ko, ak ien bar etale kobban Jemen-ei in ad. Im ilo an kar wonmaantak kakobaba ko rellon elkin kwelok kein, ewor wot ruo iair raar wappen jen armij in Majol ro im raar vote-i kakobaba kein. Juon ej nan ukot waween ad kile kien in ad jen “Government of the Marshall Islands, nan Republic of the Marshall Islands”, im eo juon ej nan komman bwe kajin in ad en anjo ne ej wor pok ko ikotaan kajin Majol im kajin belle.
Ta in elap jej wojake ilo ad kobatok ibben droon rainin? Kwoj woj ar jolok ien ko ad im kobatok ijin nan ad kememe Jemen-ei in ad im kio ej 45 iio dretan. Enoul-lalim iio ko remootlok, ro Jemen im Jinen ailin kein raar joke im kaben lomnak in ibbeir bwe ailin kein im armij rein ad ren jenoklok im jutak kin neer make im kalok juon air kien eo ej tomak ilo Anij imaantata, manit eo ad eaurok, im tomak ilo kien anemkoj ilon tata.
Ij tomak kijwoj ej kobatok ibben doon rainin, jaab nan kemem-e raan eo Jemen-ei in ad eaar wappen jen armij in ailin kein wot, ak nan ad kwalok nan doon im lal in ke elap an utiej burwod kin jerbal in elap eaar bok jikin 45 iio ko remootlok, mekarta elon im lap melijjon ko jaar iooni einwot jet armij ro ilo juon lal eo komman jen bok-im-na.
Ilo ao lomnak kake, ij tomak jej bareinwot kobatok rainin nan ad kemem-e peran ak courage im lolatat ak wisdom eo an rein im raar ribuk meto in im kojeramman kij kin Jemen-ei in ad. Ilo lomnak kake, jej itok bwe jin kamolol ro Jinen im Jemen ailin kein ilo air kar jutak bin im kalok lal in im jej anemkoj kake rainin. Ij tomak kijwoj melele ke jerbal in kalok juon lal ebok elap ien, kijejeto, im kelmenlokijon ko raetok kitier. Kalok juon lal ej juon jerbal eo ejjab bidodo, an jejjo wot! Jej kamolol jerbal in tol an eo jemeñ Aelon Kein, Irojlaplap im President eo kein kajuon an Aelon Kein, Amata Kabua, im ro raar jerbal ipan ilo jok na lemen Jemnei in ad.
Unin tel in ad rainin “Ukun-im-Jad”, ej kakememej kij kin menin jeramman im jolit kein ad ion ene emora, im ko ilo malo ko ad bareinwot, im letok jen eo ej ad Ri-komanman. Unin tel in ej bar kakememej kij kin eddo kein ad jen doon ilo ad kajibwebwe-ik waa in waan armij in Majol.
“Ukun-im-Jad” maron bar kojerbale ilo an lutok tok kobban Compact ne ekaal ikotaad im kien eo an Amedka. Im ejimwe im jejjot bwe jin kamolol kin menin jeramman kein Kien in ad ej jerbali jen ien-nan-ien ilo an bukbukot tok kobban lojaan ailin kein im armij rein ad.
Ekkeinlok jidik, kejwoj ar kamool e ilo an kar Hon. Kalani Kaneko, Minister eo an Foreign Affairs im Trade, im U.S. Charge’ Lance Posey kakirmool ke kwon in ekaal, Compact III, ej bok jikin jen rainin im wonmaanlok ilo an dedelok an representatives rein an Kien kein ruo kakūrṃool ilo Exchange of Notes eo ear bok jikin jet minute re motlok.
Compact in ej letok juon maron nan kadeklok im boktok elonlok jeramman ko nan Aelon Kein. Juon in jeramman ejelṃae epepen in rainin, ilo an jermatmat juon bujon jemjera eo enaj kakke aikuj ko rellon an armij in Aelon Kein ekoba elaplok jeen in jipañ ko nan Kien in iumin iio kein 20 rej pedo tok. Eon ko iloan Kon in rej letok elaplok jipañ im jeramman ko im, elon wot iaer raar wotlok ak jako iloan Kon ko lok imaan. Bareinwot, elaplok maron letok nan kij nan komakutkut kilen an money kein jerbal nan aikuj ko ad. Mol bwe ilju im jekḷaj in an aelon kein e meram lok, botaap jej aikuj wot naj puk-pukot lomen joraan ko renaj jelet kij im lal in ad itok jen ukoktak in Mejatoto, im bareinwōt na mejḷan aikuj ko rejelōt kij im rejañin dedelok,itok wot jen Nuclear legacy in eto ad mour kake.
Eliktata, ilo jerbal kein an Compact III, jej bareinwōt aikuj kadedelok kon eo na etan Federal Program and Services Agreement (FPSA) eo ej kemlet weween an itok federal programs im services ko nan Aelon Kein im Kien eo. Mottan wot jidik im enaj dedelok jerbal in elap an aurok. Kin menin, jej aikuj jerbal ipan doon ilo ad emakut ṃaanwaj im kadedelok jerbal kein bwe ilju eo immaan en juon ilju eo enaj emmejaja mour eo im armij in Aelon Kein. Iumin aolep jerbal kein ej kijejeto adwōj jen doon im ad monono in bok ijoko konaad im kaarmej jete konaan ko ad makmake nan emanlok eo an lal in ad.
Kajitok eo e aurok in, ta eo konaam nan lal in am? Nan quote I juon ian kar President ro an lal in ad, President Imata Jebro Kabua, delegate nan ConCon eo moktata, eo ekka an ba: “Elane ejjab kwe, enaj won? Im elane ejjab kio, enaj naat?” Kur eo in (challenge eo nan jọdikdik ro elaptata) bwe aolep ren bok ijoko konaer. Kate kom pukot jelalokijen im kapeel ko rekkar nan ami naaj manik im ri binniki wa in waan aelon kein!
Ilo ad kememe Jemen-ei in ad, im ilo ad kile ro Jinen im Jemen ailin kein im ear rub enbwinier ilo air kar kalok Kien im lal in ad, jej kamolol ir ilo ad juumemej ion wa in waad, ilo ad komane ijoko konaad kajojo im lemaanlok im lelonlok jokkwun mour nan aolep armij rein ad ilo ailin kein ad.
Ilo ad kommane waween in im bok ijoko koṇaad woj kajojo, jej maron likit ad kojadikdik bwe kom ro riktak in ailin kein kom naaj bareinwot loor jinook kein einwot ad loor ko jen ro imaanlok, nan kalok juon iliju im jeklaj eo emmanlok nan armij rein ad im lal jidikdik in ad im ej jolet jan Anij Jemed.
Ilo ad kememe Jemen-ei in ad, jij kakememej doon ke mekarta elon melijon ko rellap jaar iooni, im ko jet im jej ioni rainin, kien anemkoj in ad ejjanin likjab ilo waween an maron eo an Kien etal nan ro emoj kelet-ir, ak men eo ribelle roj ba “peaceful transfer of power” elkin emen iio otemjej.
Aet, ejimwe melele in ke Jemen-ei in ad ej bedbed ioon monakjen in komman kien ko an rilikin ro jen ailin in Europe im Amedka kan, botaab ro Jinen im Jemen ailin kein raar bareinwot kobaiktok Manit in ad bwe en bar mottan wot Jemen-ei in ad im ej kien eo e-utiejtata an lal in ad. Melelein men in ej bwe Jemen-ei in ad ej juon eo ejenoklok jen Jemen-ei ko jet ibelakin lal in, einwot an Manit in ad an jenoklok jan Manit ko an ri-lal ko jet.
Kin menin, en lap an utiej burwod kin Jemen-in ad, juon eo ejenoklok, juon eo ej bedbed ioon Manit eo elap an emman, im ej ad jolet jan Anij.
Nan kojemlok naan jidik in an Kien in ami ilo jotenin lok rainin, ij kajjitok ibbed woj jimor armij in Majol bwe jen mool nan Aelon Kein ad ilo jerbal ko ad im en laplok ad kijejeto ilo ad kalok ailin kein ad bwe jen maron tobar juon iliju eo emmanlok jen in rainin. Ejjelok berre ibba ke ne jooj naj kate kij im bok ijoko konaad kajojo, iliju eo an ajiri rein nejid im jibud enaaj juon eo e-karbob im obrak kin jeramman.
Ilo etan Tommy im aolep ro ilo family ko amro, ij lewaj am naan in kojeramman ilo ad kememe 45 iio in Jemen-ei in ad.
Anij en kojeramman kojwoj aolep im Anij en laplok an kojeramman Ailin Jidik Kein Ad.”
