EBEYE, KWAJALEIN, MARSHALL ISLANDS – February 10, 2026 – H.E. President Hilda C. Heine and First Gentleman Thomas Kijiner, Jr. attended the 82nd Anniversary of Kwajalein Atoll Kamolol Day in Ebeye, Kwajalein.
After the ceremony, Public Schools System (PSS) Commissioner Natalie Nimmer and Assistant Commissioner Jelton Riklon toured President Heine at the Ebeye Public Elementary School’s newly constructed buildings, which were blessed during a ribbon-cutting ceremony held as part of the 82nd Anniversary of Kwajalein Atoll Kamolol Day in Ebeye, highlighting ongoing efforts to improve educational facilities on Ebeye.
—
Keynote Remarks for H.E. President Hilda C. Heine
Kwajalein Day | February 9, 2026
Iakwe kom woj aolep.
Mokta jen ao bok jidik konao ilo program in, ikonan bojrak jidrik im kile im kammolol Jemed Ilan kin mour im ejmour. Bareinwot kenaan kobalok ilo kememej Kiorong Sam, juon eo elap ao jela kajen im iar jerbal ipan ilo jerbal kein an kora ilo Aelon Kein iumin elon yio. Kakije Aineman Kiorong Sam.
· Kile manit eo, Chairman Lanny Kabua, Vice-Chairman Farrend Zackious, Irooj im Lerooj ro, ekoba Owner eo ilo imweo mweir.
· Kile Iroij im Leroij ro jet an aelon kein ibelakin Majol im ilikin Majol in.
· Ikonan kile Irooj ro rej jeban Mojen ko emen, elaptata Iroojlaplap Michael Lamanini Kabua kin an kabellok eniin eneen, Ebeye, bwe jooj en kuuk tok iben droon, monono iben droon, im kammolol Irooj iben droon kin rainin eaurok nan armij in Kwajalein.
· Ikonan bareinwot kile Junior Morrison James eo ekar boktok enaan in an Iroojlaplap in ilo elikin raelepen rainin.
· Kile Reverend Lawson Matauto, President eo an Jar in Rarikdroon im bareinwot Chaplain eo an Nitijela, im korein rikaki eo; Reverend Kauru Kaious jen Assembly of God im korein rikaki eo; im bareinwot rikaki ro woj relap ilo kabun ko jet im ro karejareir.
· Kile Alap ro, aolep armej in Kwajalein, im rein rej jukjuk im amnak ion Ebje in im bareinwot ro raar itok jen Santo, Carlos, im ene ko jet ilo Aelon in nan aer kobatok ibed rainin.
· Kile Speaker Wase, Vice-Speaker Zackhras, im ro karejeraer; Minister im Senator ro rebed ijin rainin ekoba ro jet raar jab maron in kobatok im ro karejerair.
· Special kile nan rikwelok ro 3 an Kwajalein, Honorable Minister David Paul, Senator & Irooj Kile Kabua, Senator Kitlang Kabua, im ro karejerair.
· Kile Mayor eo an aelon in, Honorable Mayor Hirata Kabua im korein Mayor eo, ekoba Council eo an Kwajalein im ro karejerair.
· Kile Mayor ro jet rebed ijin ekoba ro rekar jab maron in koba tok rainin.
· Kile ro mottad ilo Diplomatic Corps eo – Australian Ambassador H.E. Paul Wilson, Japan Ambassador H.E. Hirohisa Soma, ROC Taiwan Ambassador H.E. Herbert Hsu, im U.S. DCM Gregory D’Alesandro.
· Kile bareinwot Colonel Matthew Cannon im USAKA delegation eo.
· Kile band eo an Kwajalein High School.
· Kile aolep rijikuul rein rar kobatok elikin ralepen rainin.
· Kile kom woj kajojo.
Kommolol nan Leadership eo an Kwajalein kin kir eo bwe komro en Tommy kobatok ilo rainin aurok nan Irooj ro, Alap ro, im aolep armij in Kwajalein.
Rainin, ikonan kenono jidrik kin jet layer in history ak mattan bwebwenato in aelon in, jen etto, tore in bata eo kein karuo tok nan rainin im eniin jooj ej koba iben droon nan kammolol.
Ilo bwebwenato kein ad, mokta jen an kar itok lal ko jen likin nan Aelon Kein im ukot wawein ad mour, Irooj im Alap ro ad rekar jet joor ko rekajoor im rar drebij im kejparok Aelon kein im armij ro ie. Mol elap kar tarinae iben ri-etto ro ako wawein in ejjelok oktak jen history in aolep lal ko jet. Ri-etto rekar aikuj kamani tarinae ko nan secure i mour ko aer make im kejparok bwidej nan armij ro aer.
Bwidej nan kij armij in Majol ej enwot “gold” kinke lal in ad ej komman jen bok im na. Eddo ko an Irooj ro im Alap ro ioon bwidej ej juon sacred duty ejjenolok kinke ej aikuj wor jikin an armij ro droer mour im ainemmon, jikin aer eonod im kakijen, jikin aer kakije im jikin aer kallup bareinwot.
Ilo ad reiliklok, elap oktak rekar buk jikier jen mour in etto nan jemlok in bata eo kein karuo tok nan rainin. Ilo ad emmemej ro lok imaan, jej bareinwot kammolol armij in Amerika, kien eo aer, im elaptata ro rekar sacrifice im luuji mour ko aer ilo aer kar jodrik tok aelon in ilo 1944 nan karolok ritto ro ad jen mour in kamakoko, entaan im jerata ilo ien tarinae.
History in bata eo ej kwalak waan jonak in kijejeto ko an armij rein ad. Mekarta rekar ioon juon tore emarok im bin ako yokwe eo aer kab mour in kautiej dron ko aer non dron ekar kaman bwe ren maron jutak im bin iben droon. Ilo Kwajalein in, jej loe ke wawein in ej mour wot. Jej loe ilo an riKwajalein ro jola nae dron im kautiej dron im kautiej manit eo aer. Im aer endrein ekommon bwe ron jot ro rojenolok kin tomak im bokloket ko aer enwot jot armij in Kwajalein.
Liberation Day in ak raan in Kammolol in an ri-Kwajalein aurok kinke ej kakemejmej kij kin juon jepta kaal in governance ak wawein kien e armij in Majol. Jekar erom juon Trust Territory elikin bata eo im tok elik juon sovereign Republic ak juon lal eo im ej kien e make.
Mekarta oktak wawein ad kien e koj jen ad mour iumun Mantin etto, kien eo ej atartar dri im kat wot iben Manit eo im armij ro. Wawein in elap an alikar ilo Jemenei eo Ad ilo an wor an Council of Irooj eo formal legislative role. Melelein ewor an ritel ro ad ilo Manit maron in etale bill ko ilo Nitijela elaptata ne renaaj jelet bwidej im manit, mokta jen aer erom kakien. Ejab jemlok ad kammolol Founding Father ro ad kin lo emmon in im karok kein bwe jen maron debij im kejparok manit eo ad.
Enwot adwoj aolep melele, jerbal im eddo eo an kien ej nan bukot mejlan aban ko kejwoj ej iooni nan kakomonmon lok jokin mour. Ejjelok oktak jen eddo ko an Irooj ro ad rellap im rej Irooj in tel, Irooj in jela, im Irooj in lale armij. Kien im Manit Eo rej wonmanlok ilo ad jimor lale armij ro im kebooj er nan ilju im jeklaj.
Ejab jemlok an Kien eo ami kate kin ijo kwonaan im bukot tok jiban ak jerammon ko jen likin elaptata ikijien project kein jej loi rainin. Elon tobrak ko jen iben donor government im partner ro jet mottad enwot Amerika, Australia, Japan im Taiwan ekoba ADB, World Bank, UNDP im ko jet nan kojerammon kom. Elap ad kammolol e rein mottad kin jiban kein aer nan kakajoorlok ejmour, jelalokijen, im wawein ko jet raurok nan lal jidrikdrik in ad.
Ikonaan bok jidik ien im lewaj an Kien eo iolap kilep jerbal kein rej bok jikier ion Ebeye in, ilo Ebeje in im kile leadership eo an Mayor Hirata Kabua im Council eo an, bareinwot rikwelok ro nan Nitijela, Irooj im Alap ro an Aelon in kin lab wonmaanlak mejed ej loi. Juon in jej bareinwot nej monono in dedicate i kio ikijien jikuul kein, bareinwot seawall ne ej jepole Ebeye in, ial kane emoj aer pave. Elon ko ijab maron kolaajraki ako ikonaan bok iien im im lewaj ad kile im kamolol Leadership eo an Aelon in bwe ejelak kajitok ke elap aer menokadu im bukot bwe en emanlok mour ion Ebeye in.
Theme ne an rainin, “Kan im Aen Mera” ej ekeijel iben jibadbad im kotabar ko an kien kinke ej kalikar aurok in armij ro. Foundation in juon lal ebed iben armij ro ejjab ilo building ko, seawall, ial, im ob ko jej kaloki ako elaptata ipan jodikdik rein nejid im jej katoke iliju eo aer. Mol ke aurok men kein ako jej watok ke rej menoknok elane jenaaj keiri aurokier iben aurokin armij ro ad make.
Unleplep in aolep project lon lon ko an kien rej nan kojerammon armij ro ad, jiban jukjuk im pad ko, im kadoklok Aelon Kein Ad. Jerbal kein aolep rej bok jikier ilo ad kebooj armij ro ad elaptata ajiri ro nejid im jibwid enwot ke er eo renaj wonmaanlok kin lal in ad. Ilo ad kebooj ial in nan ro tok elik, jej tomak im kejatdrikdrik ke enaj biroro aer wonmaanlok kin kotabar ko aer make im rekar im rejejjot ilju im jeklaj.
Ilo kapellok eo an Nitijela alon eo lok, ikar ba ke kejatdikdik eo an Aelon Kein epad ipan armij ro ad im ikonan bar eliji melele in rainin ke ne armij ro rejeramman, innem lal eo ad ebar jeramman. Lukin mol men in.
Etto, ekar toor botoktok iben ritarinae ro an Irooj ro kin bwidej nan armij ro droer. Rainin etoor meneo kadru iben ritel rein ami ilo kien kin aer kate er bukot jerammon ko nan armij ro im rej jijjot ilo etaer.
Emool naan kein – Elane ejab armij ro innem eban Irooj ro, im ejjelok oktak iben kien – Elane ejab armij ro innem eban wor kien. Kan im Aen Mera.
Yio eo lok, ikar ba elon wawein ko im rej kajenolok armij in Kwajalein im juon iaer ej LUA………………..Ekabdre ejjelok ad! Ak enta – menoknok lokwot ian ak armij lokwot iaer. Kan im Aen Mera.
Kin naan kein ao reiot, bar juon alen kommol kin kir eo bwe in maron bok konao rainin. Anij en kojerammon kom, armij in Kwajalein, im elaptata Anij en kojerammon Republic in ad. Jerammon!
