MAJURO, MARSHALL ISLANDS – November 26, 2025 – Enaan eo an H.E President Hilda C. Heine ilo launch eo an ENRĀ ak Universal Basic Income (UBI) program eo.
—
PRESIDENT HILDA C. HEINE REMARKS
AT THE ENRA LAUNCH
NOVEMBER 26, 2025
Iok Iokwe
KILE IM KAUTEEJ
Moktata Irooj Jemed ilan. Kamoolol e, kin kejbarok eo an nan kojwoj, nan aelon kin, im an kojeramman kij im jab jemlok an lale im kojeramman koj.
Ikonaan bareinwot kwalok ao kile im kauteej Ri Kaki in ear kobellok iien in, Ri Kaki Josen Teicoi m aolep Ri Kaki ro ilo bellakin aelon kein. Kile im kamoolol erwoj kajojo.
Bareinwot ikonaan kile Manit in ad: Chairman Lanny Kabua, Vice Chairman eo an Farrend Zackious; Iroj im Lerooj kab Owner eo ilo Mweo Mon Irooj; Ikonaan bareinwot lelok juon kile nan Lerooj Esther im Alap eo an bwidej in im kijwoj ej maron anemkwoj ion im makitkit ilo jibonnin rainin.
Ikonaan bareinwot kile Cabinet eo im ro karejerear; Kile bareinwot Speaker, Vice Speaker im ro kajereraer, bareinwot;
Kile Chief Justice Carl Ingram im aolep riekajet ro ilo Mweo Imon Ekajet;
Ikonaan bareinwot kile Mayor Ladie Jack im kora eo karejeran, bareinwot aolep mayor ro ilo bellakin Majol in im ro mottaer.
Ikonaan bareinwot kile Diplomatic Corps eo; Ij loe aoleper im pad jibbonin. Ikonaan kile er. Kamoolol kom kin ijoko kunaami nan jipan Aelon kein.
Bareinwot kenaan kile Chief Secretary im aolep ro jeban ministries im agencies ko an Kien; Kamoolol komwoj, bareinwot Chairman im ro uwaan PSC. Kamoolol kom. Aolep rijerbal in Majol im aolep armej in Majol. Kile komwoj im kamoolol komwoj kin ami kar maron kobatok im kautiej im jipan celebrate I juon ijjino, juon milestone ilo history an Aelon Kein.
KAMOLOL
Juon special recognition im kamoolol nan HE Laura Stone, Ambassador eo an Amedka nan Aelon Kein. Kamoolol e kin remarks ko. Thank you for the good words, and also for being here and to help celebrate with the Marshallese people. There is no question that without the US support, this would not be possible, jej bar kamoolol.
Ij bareinwot kenaan kile im kamoolol Ambassador eo an Taiwan ak Embassy eo an Taiwan im ro rar itok ilo etan. Kinke jejela ke ebar wor kunaer ilo Trust Fund eo ad. Im ilo an bar eddoklok, ej itok jen bar jipan ko aer bwe en bar maron lap koban jaan in ad.
Ikonaan bareinwot kile im kamolol Bryan Edegar kab Chairman eo an Board eo an MISSA im aolepen staff eo an. Kamoolol kin aer kar monono in partner ipan Kien nan lorlorjake jerbal eo elap. Dileben jerbal in kajeedeed kij AK ENRA in ej itok jen jerbal ko aer ilo aer lorlorjake an armij register im naj bojak in kommani kolla ko jej jela ke renej jinoe bok jikier ilo raan eo iliju im wonmaanlok. Im einwot an kar Chairman in ba, ejab jide bwe kojean en kar kammane program in ilo rainin, kar deliberate plan an Kien bwe kijwoj en kamoolol ippen doon. Jen kamoolol ilo wiik in kamoolol in an Amedka, kab wiik in kamoolol in an Majol einwot jejela ke Gospel Day ej pad ilo wiik in lal im wiik in ej wiik in Thanksgiving. Im jar kenaan kamman im kalikar ke jej kamolol. Im ilo ad launch e program in, jej launch e ipen Irooj. Kamoolol e kin onake eo an nan Aelon Kein.
Ejjelok kajitok ke etto wot ad kottar ENRA! Ebwe an to, jen yio eo lok tok nan yio in, ruo de yio im elap ad monono. Ilo kotaan eo jaar kottar, ebwe an lon naan in konana im kabwereer ko rar walontak ilo mejatoto, im komwoj melele kake jeban kenono kaki. Elon naan ko rar pukwoj kojwoj; em elaptata, elap an kar lon naan in jeleke Kien in ami. Elap ad ronjake ke bwilen reputation eo an Kien ejanin pad ilo Level eo mwe elane jej ba juon wawein, jej tomak ke Kien enej deliver. Emoj juon in iien nan kamol e ke elane Kien ej ba ej kammane juon kotobar, ej etal nan ne etobrak im juon in kein kamol.
ENRA Bwe Jen Lale Rara ej juon ian investment programs ko an Kien ilo armij ro ad, juon joortokilik katoke ipad kij ri Majol, aolep ri Majol ro rej jukjuk im amnak ilo Majol! Kien in ej kejatdikdik ke ilo an jipan armij ro an, armij ro an renaj jipan ir make, im elaptata jipan Majol in aer! Rainin jej celebrate im kememe an ijjino ENRA, juon program eo elap pelakin kinke aolep ri Majol rej nej maron bok leen!
Jemelele ke ear drelon elap jaan ilo budget eo an Majol ilo yio eo ej jemlaklok nan am nej maron koraeki koban Enra in. Juon jonok eo elap, ejanin kar wor ilo bwebwenato in Majol ilo juon money eo jej kadiwojtok im lelok nan armej ro kajojo ilo Majol in.
Ilo aolep quarter, money in enej diwojwaj im jinoe ilo quarter in imaan, ilo yio in jejela ke ewor tarrin $6.6M ej diwojtok nan ad ajeej e im kojeramman doon im jej kejatdikdik in bwe to in wot an pad im kajoor Trust Fund eo an armij in Majol, to in wot an naaj program in mour im wonmaanlok wot. Jej kojatdikdik bwe iomwin 20 yio in ej beddo tok iomwon Compact ne kio im kijwoj ej mour, enej wonmaanlok program in nan kijwoj kajojo.
Kinke jonan jipan eo jej boke ej pedped ion interest eo mwe nejin Trust Fund in im ej kwalok jen ien nan ien. Jet ien emaron lap lok jidik jonan en jej boke im jet ien emaron dik lok jidik ekkar nan interest im ekkar nan an bareinwot lon lok armej rej delon tok ilo program in, einwot ad jela ke jen iien nan iien ej lon ro rej lotak, ej lon ro rej roltok jen likin im emaron lon lok armej. Ej bareinwot maron iiet lok, im ne eiiet lok ekwe enej bar laplak jonan eo mwe kijwoj ej kajojo boke. Ak mol eo in, ENRA enaj duoj waj aolep iio otemjej, 4 alen ilo juon iio!
Im jela eo ad ilo iien in ilo iio in $200 tala juon armej ilo quarter in enej diwojwaj ilo Christmas in. Jemaron ke lelok juon kamolol im kapokpok nan aolep ro rar lolorjake wawein in. Einwot ao kar ba ilo konono ko ao week eo lok bwe, ENRA in ej iwoj nan lelonlok jidik level in mour an baamle ko kajojo. Enaj kokajoorlok spending power ak maron nan buki aikuj ko an family ko kajojo. Pedped in Kien ej jipan kaloke nan juon baamle, enaj komman bwe leen jerbal ko am make jen salary eo am, kowainini, amimono ak weween ko jet, en kajoorlok aniier im jerbal in en pad im kemour kajojo baamle.
Thanksgiving im Kamolol Day rej ijjino ilo week in einwot ao kar ba imaan. Jej celebarate I ippen doon kin Enra in. Jen kamolol ri-tel rein ad kin lo emman eo aer, kinke raar monono in take risks ilo kejatdikdik eo ke ENRA enaj eman nan armij rein rej jerbol nan ir; im jen kamolol kien eo mottad jen Amedka kin jipan kein aer nan kij!
Einwot ao kar ba imanlok, tomak eo ilikin program in ej bwe Kien ej aikuj jipan aolep armij, elaptata ro rjjab maron jipan ir make, kinke lal in ad ej kajoor in wot ak mojno in wot ro re mojno tata ilubwiljid woj! Ne elon ro re mojno, ebar einwot mojno lal in ad! Im kotobar eo in bwe kijwoj en wallontak bwe kijwoj en jipan doon.
Beran im kejatdikdik ej opposite in komtalik im ekkol. Aolep ien jej jino juon program kaal, elon kakkol ko rej itok iman. Jeban jela ta imaan, im ear wor ekkol ipan ri tel ro ami ke emaron jab tobrak. Kio ke etobrak ENRA, jej kejatdikdik ke enaj meoeo man ial in ad; ilo mol jab jela ta imaan ikijeen ukoktak ko jet re maron bok jikier.
Elon rej ba jen ekkol bwe business ko renaj lonaj wonaan mweiuk; enaj laplok wonaan rent im lease ilo bwidrej ko, im laplok kokonanan ko an manit im kabun ko im weween ko jet. Mol ke emaron walok men kein ak jen bar likit ad kejatdikdik ilo lo emman an ri-tel ro ad ilo business, ri-tel ro ad ilo Manit, ri-tel ro ad ilo Kabun im doluul ko bareinwot ke renaj reilik reimaan ilo aer bareinwot melele kin eddo ko an kajojo family. Mol jet kein risks, ak elap ao kojatdikdik bwe eman eo jen program in enaj laplok jen nana ko remaron walok. Kojatdikdik en pad bwe ENRA ej nan jipan im jab nan kokkure kij.
Ij lelok ao naan in kamolol nan Minister David Paul, bwe ear jab komtalik mekarta elap naan in konana ko raar ion lok, ak ear jutak im pin ilikin im iun program in jen jinoin. Ij bareinwot kamolol kin kin kijejeto eo am bwe en tobrak rainin. Kamolol ro uan Cabinet eo kab Speaker kab Vice Speaker im ro uaan Nitijela, bareinwot kab ro rar letok support eo aer program in ear maron tobrak.
ENRA ej kinoor tok juon level in kejatdikdik nan armij in Majol. Ij bar repeat i, ENRA ej kinoor tok juon level in kejatdikdik nan armij in Majol! Kejatdikdik eo Kien ear koblalaiki jen jinion Kien in. Kipeddikdik im kejatdikdik ej ijino rainin!
Joij im boke im kojerbale ENRA ilo tiljek im kojerbal nan aikuj ko an family im reaurok im renaj lemaanlok juon baamle. Won ejela ta ko raurok nan juon family, ejjab Kien, ejjab bank ak ejjab doluul ko jet; ro wot rej jeban baamle ko rejela aikuj ko an baamle. Jej door ad kejatdikdik ion ro rej jeban baamle ko bwe renaj keplaaki menin jeramman in ilo juon weween eo etiljek.
Bar juon alen, Jeramman nan komwoj kajojo im jeramman nan Republic of the Marshall Islands. Jen pad kin Kipeddikdik im kejatdikdik! Kom kanoj in emool.
