MAJURO, MARSHALL ISLANDS – October 8, 2025 – H.E. President Hilda C. Heine joined Honorable Speaker Brenson Wase and other dignitaries at the groundbreaking ceremony for the reconstruction of the Nitijela Building. The event marks an important step forward following the devastating fire that destroyed the original structure.

—

Enaan eo an H.E. Hilda C. Heine

President eo an Majol

ilo ien Rube Bwidej nan Ekal eo an Nitijela eo Ekaal

October 8, 2025 | 2 PM

Kommol tata, Riomejal.

Mokta jen ao bok jidik kwonae ilo program aurokrok in ilo elikin relep in rainin, ikonan moktata lelok kile im kammolol nan Jemed ilan kin joij im onaake eo an nan kijwoj kajojo, im kin aolep karok im plan ko An nan lal jidikdik in ad ilo ad jerbal iben droon im bukot emmanlok eo nan armij in Majol.

Ikonan kile:

– Ritol ro ad ilo manit, Chairman Lanny Kabua, Vice-Chairman Farrend Zackious, kab Irooj ro motaer ro, ekoba owner eo;

– Juon kile eo ejenoklok nan Lerooj eo im Alap eo air bwidej in im jerbal in e-aorok ej bojak in bok jikin ioon;

– Cabinet member ro im ro karejarair;

– Honorable Speaker Brenson Wase, Vice-Speaker Isaac Zackhras, im aolep ri-kwelok ro ilo Nitijela eo, ekoba ro karjaraior;

– Reverend Lawson Matauto ekoba aolep Ri-kaki im Kora-in-Rikaki ro jemed im jined ilo kabun ko ad kajojo;

– Chief Justice eo im aolep judge ro ad ilo Imon Ekajet ko ad ilo belaak ko aolep ilo Ailin Kein;

– Chief Secretary eo, Chairman eo im ro ilo Public Service Commission eo, im aolep ro roj jeban ra ko im SOE ko, ekoba aolep rijerbal ro aolep an Kien in ad;

– Ro ilo Diplomatic Corps eo, ekoba rein raar maron kobatok tok ibbed elkin raellepen rainin;

– Ro rekar koba tok jen private sector eo, ekoba Mr. Jerry Kramer jen PII, eo im ej contractor nan project in;

– Kile komwoj aolep kom ar jouij im kobatok nan ad kakur-mool jerbal in elap ej bojak in bok jikin.

Iokwe komwoj aolep. Ij jutak imaan mejemi rainin kin utiej im monono ilo ad bojak in rubwe bwidrej in, im kajutak imon kweilok in ad ekaal, ak ilo an armij in raan kein ba, ej Nitijela 2.0; ej mweo in im rikweilok ro ad rej kobatok ie im buuj jelman Aelon Kein Ad.

Ikonan kokaal ao naan in kokajuur im koboran nan ritto ro ad, aolep ro uwaan Nitijela jen jinoin nan rainin, im aolep armij in Majol im rej emloke lok Nitijela eo mokta, ilo air likit mwiin ilo buruer im lomnak ko aer. Ak einwot ao kar ba ilo enaan eo ao ilo tore eo Imon Kwelok in ear urur im madeoneonlok, ke jeban meloklok aorok im aiboujoj eo an toon wot ad bed im mour.

Nitijela ejjenolok jen moko jet imwon kien kin aao in an. Ej juon kokale eo nan kwalak an lal in ad juttaklok make iaan enwot juon lal eo ej kaurok kien anemkwoj, im ej immon komman im kakwon aolep kakien ko an armij in Majol, im ej ijo jej bareinwot jolet manit, wawein mour, kejbarok ainemmon, im bareinwot jerbal ko renaj kojbarok ilju im jeklaj eo ad.

Mekarta jekar bed ilo buromoj im inebata tore eo ekar bwil mwiin ruo alon remootlok, ak jen kammolol Irooj bwe bwelen juon in ial nan ad kokaal mwin enwot ad melele mweo ekar bwil ebwe an kar ritto im mor. Kio enaj wor juon mwon kweilok eo ekaal, im enej komman bwe en drik an Kien naaj jolok jaan ko rellap nan repair im maintenance. Enwot adwoj jela jerbal in repair im maintenance robok ellap maron.

Rainin jooj ej kobatok iben droon nan ad rube bwidej in bwe jerbal in ekkal eo an mwiin e-aorok en bok jikin ilo juon tore eo emokaj, enwot ao kar kalimur nan armij in Majol.

Ikonan bwe ilo ad rubwe budrej im jemjem maal, jen pijaikilok juon em kaal eja jokjok im nomamein wot mweo late President im Iroijlaplap Amata Kabua ekar pijaik tok bwe en ad jolet jen E im ro lok imaan ke rokar jutak im emmejrake Aelon Kein. Ijo wot ke, enaj wor jejjo oktak ko nan kakomanmanlok im kabdodoiklok ad maron kojerbal kin kein jerbal kein rekaal raan kein.

Elap ad kammolol ro jerad im mottad ilowaan Aelon Kein im ilikin Aelon Kein kin jar im naan in kokajuur ko aer ilo tore eo ekar walak joreen eo im elap ad kar eddo kake. Ij bok ien in emman im lelok adwoj jimor kamolol nan President Donald Trump im Kien eo an Amedka kin jiban eo aer elap, im ilo kamolol in ij kobaiktok Ambassador Laura Stone kin ijoko konaan. Ij bareinwot likit ad kamolol nan President Lai Ching-te im Kien eo an kin jiban ko aer bareinwot. Ij kile Charge’ eo an Taiwan im ear kobatok, Charge’ Hank Liu. Juon ad naan in kamolol nan President David Adeang, kien eo im armij ro mottad ilo Nauru kin jiban eo letok. Eliktata im ejab rik tata, President Wesley Simina, kien eo im armij in Federated States of Micronesia kin air maron elloke peier im jiban tok armij in Majol ilo tore in ebin. Ad naan in kamolol nan rein jerad im mottad kin jouij kein air rellap jen maron ba.

Enej menin likjab elañe iban komolol Mr. Jerry Kramer im PII kin jerbal kein rellap rej kommoni non Aelon Kein Ad. Jij melele ke eloñ project ko roj edroiki ilo tore in, ak kin air kile aorok in jerbal in ekkal in nan bar kajutak jikin pepe in eutiej an armij in Majol, raar erra bwe jerbal in en le imaan jerbal ko jet air.

Eliktata im ejab driktata, juon kammolol eo ejjenolok nan Lerooj eo im Alap ro aer bwidej in. Kijwoj melele ke ne eaar jab jen jouij kein ami, elon wot iaan jerbal ko an Kien reban kar bok jikier. Elap ami emool jen jonan maron ba.

Ejjelok naan elaplok imaron bar ba ijelokin naan in kammolol kein ao ilo etan kien im armij in Majol.

Bar juon alen, komwoj kanuuj in emool im Anij en kojerammon kejwoj aolep im Aelon Kein Ad.